لغتي الإنجليزيه ... وين كانت ! ووين صارت ! English Language
مساء / صباح الخير .. ✽
كيف الحال متابعات مدونة The Maram's ؟
اليوم التدوينه ابحكي فيها عن لغتي الانجليزيه وشوية نصايح
تخص هالموضوع ... ✧
بالوقت هذا صارت اللغه الانجليزيه مهمه جداً جداً
بكل مكان صار ضروري نستخدمها .. ❥
اول كنت ماشوفها شيء ضروري لحد ماتورطت مره من المرات
وقررت اتعلمها حتى لو شيء بسيط اهم شيء اقدر ادبر نفسي باأي مكان ..
..........
اول شيء سويته عشان فعلاً احس اني اعرف بالانجليزي حولت لغة جوالي انجليزي واي كلمه مااعرفها اروح للمترجم علطول 😹 ❥
بالبدايه كنت أقرأ إقتباسات إنجليزيه مع ترجمتها ولآني اصور كثير
بالسناب ف أستخدم الإقتباسات ع الصور ..
بعدها صرت احفظ الكلمات والجمل الرائجه واللي نستخدمها كثير بحياتنا وبالمطاعم والكافيهات واستخدمتها وحتى لو اخطيت عادي ماأستحي
لأن ماراح نتعلم بدون مانغلط ..
وصرت اشوف افلام اجنبيه بس اشوفها مترجمه عشان افهمها والكلمات اللي تلفتني واحس اني ابستخدمها بحياتي احاول احفظها والحمدلله اشوف نفسي تطورت حيل باللغه وهذي افضل طريقة اجمعوا عليها الاغلب انها ممتازه ف
في تحسين اللغه ..
واخر شيء كنت اسويه اتابع قناة ممتازه باليوتيوب تقدم الدروس من الاساس
وبعد كل درس تقدم اختبار استفدت جدا من هالقناة 💗💗
ابحط لكم الرابط هنا
⤋
من أفضل قنوات تعليم الأنجليزي اللي شفتها
انصحكم جميعاً تتابعونها وتتعلمون منها ..
...
ختاماً : لغتي الانجليزيه الان افضل بكثير من قبل لكن لسى قدامي طريق
طويل عشان اتقنها فعلاً كتابةً ونطقاً ..
وتذكروا ان الممارسه و الاستمرار ب اي شيء هي اللي تخليك تتعلمين اي شي تبينه ..
THANK YOU FOR READING ..
♥♥
0 التعليقات