تدوينة اليوم خفيييفه ولطيفه ابحكي فيها عن ميك اب الصباح اللي احب اسويه للدوام .. ♥♥
اول شيء وقبل الميك اب اهتموا كثثثير ب بشراتكم من ناحيه روتين العنايه من غسول و مقشر وتونر وترطيب حتى يصير ماتحتاجين تحطين فاونديشن بالصباح .. ثاني حاجه مهمه جداً واقي الشمس عشان مايصير تصبغات ببشرتك من الشمس يلا نبدأ ؟؟؟ البشره الصحيه هي لحالها ميك اب واذا فيه مشكله ببشرتك مضايقتك عالجيها لا تغطينها ↡ اول شي نبدآ ب ستروب كريم هو كريم ترطيب يضيف قلو للبشره لطيف اخذته من ماك الحجم الميني ب ٤٩ ريال
ثاني شيء احب استخدمه التنت وهذا الشيء اموت عليه لاني احطه ع الشفايف يعطي لون حلو لها ويطول واحطه ع الخدود شي خفيف يخلي الوجه مورد وطبيعي وكيوووت من كذا ماركه موجود مره حلووو .. اخذته من ايتيود هاوس ب ١٦ ريال تقريبا وكان عندي بنفت برضوا احلى سعره تقريبا يا ٨٥ او ١٢٠ ريال
ثالث حاجه تغير الشكل وتعطيك لطافه وكياته هي ( الايلاينر ) يسسحب العين بششكل فضيع ويحلي بطريقه جذابه .. اخذته من كات فون دي من سيفورا مااذكر سعره بالضبط بس تقريبا ٩٥ ريال عرفتوا البنت اللي صار عليها حادث وكل مكياجها اللي على وجهها خرب ماعدا الايلانير ماتحرك ؟ هذا هو اللي مستخدمته ..
رابع شيء مايكمل الميك اب بدونه وحطيه مع ميك اب ولا بدون بيغير شكلك ويحليك اللي هو الماسكرا .. جربت انواااع كثير من الماسكرات بس مثل حقت سيفورا الحلزونيه مالقيت ولا شفت حرفياً كانك مركبه رموشش فضضيعه لاخر درجه من الجمال وتستاهل كل ريال فيها اخذتها من سيفورا ب ١٠٠ تقريباً
نجي لخامس حاجه بالميك اب تخليك كيوت ووجهك فيه حيويه اللي هو البلاشر عندي درجتين من ماك حلووين حيل وحده جايه ع اورنج ناعم يموووت وتناسب اغلب البشرات اسمها ( GINGERLY ) طبعاً لا تشوفون الصوره كيف حافرته حفر من جماله شوي واكله 😂👀💙💙💙💙 الدرجه الثانيه ع وردي احب احط منها شي خفيف فوق بلشر جنجرلي يعطي تدرج بالالوان فضضيع ولذيييذ 💜💜💜 اسمه ( PINCH ME ) ماخذتهم من ماك واسعارهم فوق ١٠٠ اعتقد ومااذكر بالضبط ..
ملاحظه : مو شرط اللي يناسبني يناسبكم .. جربوا قبل 👌🏻 ملاحظه : الاسعار الموجوده تقريبيه لاني ماذكرهم بالضبط ملاحظه : تحسون الخطوات والاشياء كثير لاني فصلت وسولفت بس هي اساسا خمس منتجات تقريبا وكل وحده تستخدم اللي يريحها ولكن انا قلت طريقتي ومفضلاتي بالمنتجات ..
اخيراً وليس اخراً ماحبيت اطول عليكم عشان ماتملون ولكن
دائما تلقوني متفاعله ع حساباتي بالسوشال ميديا ابنزلهم لكم تحت مع
كود السناب شات ..
فقط سووا سكرين شوت واضيفوني سناب نسولف وندردش سوا ونتعرف ع منتجات اكثر
للامانه فتحت المدونه وانا مو مخططه وش ابكتب او ووش ابقولكم بس ابسولف عليكم سواليف من قلبي بكذا مجال 😁👀
وافرغ مابداخلي لاني احس المدونه مُتنفس لي اسولف واكتب فيها كل اللي احب وابيه يوصل للبعض وممكن تستفيدون من هالسواليف البسيطه .. لاني احس اني اسولف على صديقاتي .. واستمتع كثير اذا شفت اعداد المشاهدات على التدوينه وصرت تقريباً اعرف وش تحبون ووش نوع التدوينات اللي تجذبكم ..
♡♡
قبل كم جالسه اتصفح البلانر حقي واكتشفت انه باقي شهرين فقط وتنتهي سنة ٢٠١٩ 😳
وانا لسى فيه اشياء مااحس اني انجزتها للاسف ف قررت اني التزم خلال هالشهرين بالاهداف
وانجز عشان اذا انتهت السنه يكون عندي لستة انجازات سويتها وصارت لي ..
..
البلانر ( الأجنده ) :
أحد اهم الانجازات اللي سويتها وصارت لي اني صار لي ٣ اشهر وداخله الشهر الرابع مستمره على البلانر والتخطيط يومياً واعتبر هالشيء انجاز صراحه لاني مو من النوع اللي يستمر
ف جالسه اتابع اشخاص كثير صحيين ورياضين سواء بالانستقرام او السناب
عشان اتأثر فيهم ويتأثر العقل الباطن عندي بس بإذن الله ابحاول التزم واسوي رياضتي بالبيت او
اسجل بنادي بحيث اتشجع مع البنات ..
حطيت جداول قدامي على الالتزام بالاكل الصحي والرياضه وشرب المويه
وان شاء الله متفائله خير اني ابوصل للي ابغاه ..
مااراح اقولكم اني ابوصل للوزن المثالي او الجسم المثالي خلال شهرين
لانه مستحيل لان عندي قناعه الشيء اللي يجي بسرعه يروح بسرعه والحرمان يرجع للشراهه
الكتابه ( الخواطر ) :
يمكن محد يعرف اني احب اكتب خواطر وافرغ مشاعري بالكتابه ومتفائله بيوم من الايام ان شاء الله
كتاب خواطري بيكون بين يدينكم وتقروونه كلكم بس للاسف مع الدوام والمسؤوليات قلت كتابتي
ف بإذن الله ابرجع اكتب .. ماتعرفون قد ايش الكتابه تششيل حاجه من قلبي واكون سعيده جدا لما اكتب واختصر مشاعر كثير بكم سطر ..
تطوير الذات :
انا من الاشخاص اللي احب اقرأ كثير واذا حطيت شيء براسي لازم اتعلمه او اجيبه وهذي الصفه جدا اعششقها بنفسي .. حطيت التصميم والفوتوشوب والاليستوريتور براسي والحمدلله جالسه اتعلم شوي شوي ولسى اجهل اشياء كثير فيهم بس مافيه احد يولد عالم وعلى قولتهم مافيه احد طلع من بطن امه يمشي .. 😂🤰🏻
من الاشياء اللي ناويه اطور نفسي فيها اكثر الانجليزي اكثر شئ مهم وابي اتعلمه واتقنه بس ماعندي وقت للاسف بس ابحاول لو ساعه ع اليوتيوب ماراح تأثر علي ان شاء الله ..
الغربه :
شعور الغربه وانك تكونين بعيده عن اهلك وزوجك وبنتك شعور يحزن والله بس اقولكم شيء ! تدرون اني كنت بالجامعه ابي اطلع بعثه واكمل دراستي واجرب شعور الغربه واعرف مشاعر المغتربين بس بعد اللي جاالسه اعيشه جالسه اقول الحمدلله على نعمة الوظيفه وكثير ناس يتمنونها بس مُتعب الشعور للاسف
بس شوي شوي احس انها تغير شخصيتي وتقوييني والحمدلله التكنولوجيا مو مقصره في التواصل
وفعلاً اكتشفت وش معنى عقبات تواجهك بطموحك واحلامك وواثقه اني بيوم من الايام ابوصل للي ابغاه واحلم فيه ان شاء الله
💜💜
حسيت اني كثرت حكي و ماعندي مشكله اني اكمل سواليف عليكم بس اوقف هنا واكمل لكم ان شاء بتدوينات ثانيه ..
اخيراً وليس أخراً نلقاكم ان شاء الله ب تدوينه جديده انتظرونا قريباً
دائما تلقوني متفاعله ع حساباتي بالسوشال ميديا ابنزلهم لكم تحت مع
كود السناب شات ..
فقط سووا سكرين شوت واضيفوني سناب نسولف وندردش سوا ونتعرف ع منتجات اكثر
My Name is Maram , born in 1993 , Saudi Arabia , graduate of the department of kindergarten, blogging began as a love and passion, I love everyone share my experience, Started blogging in 2015.