صباح أو مساء الورد والسعاده .. 

على اجمل متابعات لمدونة The Maram's ♥♥

كيف حالكم ؟ اتمنى انكم تكونون بخير وسعاده .. 

للامانه فتحت المدونه وانا مو مخططه وش ابكتب او ووش ابقولكم بس ابسولف عليكم سواليف من قلبي بكذا مجال 😁👀 

وافرغ مابداخلي لاني احس المدونه مُتنفس لي اسولف واكتب فيها كل اللي احب وابيه يوصل للبعض وممكن تستفيدون من هالسواليف البسيطه .. لاني احس اني اسولف على صديقاتي .. واستمتع كثير اذا شفت اعداد المشاهدات على التدوينه وصرت تقريباً اعرف وش تحبون ووش نوع التدوينات اللي تجذبكم ..  

♡♡ 

قبل كم جالسه اتصفح البلانر حقي واكتشفت انه باقي شهرين فقط وتنتهي سنة ٢٠١٩ 😳

وانا لسى فيه اشياء مااحس اني انجزتها للاسف ف قررت اني التزم خلال هالشهرين بالاهداف 

وانجز عشان اذا انتهت السنه يكون عندي لستة انجازات سويتها وصارت لي ..

 .. 

البلانر ( الأجنده ) : 

أحد اهم الانجازات اللي سويتها وصارت لي اني صار لي ٣ اشهر وداخله الشهر الرابع مستمره على البلانر والتخطيط يومياً واعتبر هالشيء انجاز صراحه لاني مو من النوع اللي يستمر 

بسهوله ف صار عاده يوميا ادون بالبلانر يومياتي واهدافي ومهامي اللي لازم اسويها ..  

التدوين ( المدونه ) :  

بعد شهرين ويومين بيكون عيد ميلادي مدونتي تكمل اربع سنوات ف قررت ارجع اتفاعل فيها اكثر

واكتب بما اني اعشق الكتابه كثير والتصوير ف المدونه اكثر شي يناسبني واحبه حيل 

ف قررت بما انه باقي شهرين وتنتهي السنه اني ادون كل اسبوع تدوينه بإذن الله 

يعني ٤ تدوينات خلال الشهر الواحد .. 

وكتبت هالكلام عشان التزم غصب فيه وتنتظرون كل جمعه تدوينه 👌🏻💕👀 

سألت متابعيني بالسناب شات متى اليوم اللي يناسبكم  تنزل التدوينات فيه على المدونه 

وكثير اجمعوا على انه يوم الجمعه انسب شيء لكم .. 

وابشروا ان شاء الله 💙💙💙 

الوزن ( الدايت ) : 

عندي مشكله للاسف بالالتزام بالدايت والاكل الصحي والرياضه ..

ف جالسه اتابع اشخاص كثير صحيين ورياضين سواء بالانستقرام او السناب 

عشان اتأثر فيهم ويتأثر العقل الباطن عندي بس بإذن الله ابحاول التزم واسوي رياضتي بالبيت او 

اسجل بنادي بحيث اتشجع مع البنات .. 

حطيت جداول قدامي على الالتزام بالاكل الصحي والرياضه وشرب المويه 

وان شاء الله متفائله خير اني ابوصل للي ابغاه .. 

مااراح اقولكم اني ابوصل للوزن المثالي او الجسم المثالي خلال شهرين 

لانه مستحيل لان عندي قناعه الشيء اللي يجي بسرعه يروح بسرعه والحرمان يرجع للشراهه 

الكتابه ( الخواطر ) : 

يمكن محد يعرف اني احب اكتب خواطر وافرغ مشاعري بالكتابه ومتفائله بيوم من الايام ان شاء الله

 كتاب خواطري بيكون بين يدينكم وتقروونه كلكم بس للاسف مع الدوام والمسؤوليات قلت كتابتي 

ف بإذن الله ابرجع اكتب .. ماتعرفون قد ايش الكتابه تششيل حاجه من قلبي واكون سعيده جدا لما اكتب واختصر مشاعر كثير بكم سطر .. 

تطوير الذات :

انا من الاشخاص اللي احب اقرأ كثير واذا حطيت شيء براسي لازم اتعلمه او اجيبه وهذي الصفه جدا اعششقها بنفسي .. حطيت التصميم والفوتوشوب والاليستوريتور براسي والحمدلله جالسه اتعلم شوي شوي ولسى اجهل اشياء كثير فيهم بس مافيه احد يولد عالم وعلى قولتهم مافيه احد طلع من بطن امه يمشي .. 😂🤰🏻

من الاشياء اللي ناويه اطور نفسي فيها اكثر الانجليزي اكثر شئ مهم وابي اتعلمه واتقنه بس ماعندي وقت للاسف بس ابحاول لو ساعه ع اليوتيوب ماراح تأثر علي ان شاء الله .. 

الغربه : 

شعور الغربه وانك تكونين بعيده عن اهلك وزوجك وبنتك شعور يحزن والله بس اقولكم شيء ! تدرون اني كنت بالجامعه ابي اطلع بعثه واكمل دراستي واجرب شعور الغربه واعرف مشاعر المغتربين بس بعد اللي جاالسه اعيشه جالسه اقول الحمدلله على نعمة الوظيفه وكثير ناس يتمنونها بس مُتعب الشعور للاسف 

بس شوي شوي احس انها تغير شخصيتي وتقوييني والحمدلله التكنولوجيا مو مقصره في التواصل 

وفعلاً اكتشفت وش معنى عقبات تواجهك بطموحك واحلامك وواثقه اني بيوم من الايام ابوصل للي ابغاه واحلم فيه ان شاء الله 

💜💜 

حسيت اني كثرت حكي و ماعندي مشكله اني اكمل سواليف عليكم بس اوقف هنا واكمل لكم ان شاء بتدوينات ثانيه .. 

اخيراً وليس أخراً نلقاكم ان شاء الله ب تدوينه جديده انتظرونا قريباً 

دائما تلقوني متفاعله ع حساباتي بالسوشال ميديا ابنزلهم لكم تحت مع 

كود السناب شات  .. 

فقط سووا سكرين شوت واضيفوني سناب نسولف وندردش سوا ونتعرف ع منتجات اكثر 

ومواضيع حلوه .. 

SnapChat: @iimaram.3

instagram: @iimaram.3

twitter: @3iimaram